"MWAKASAKA AMRITHI MWALIMU NYERERE"

Mjumbe wa halmashauri kuu na kamati kuu ya CCM wilaya ya Tabora mjini Bw.Emmanuel Adamson Mwakasaka hivi karibuni alitawazwa kuwa Mlezi wa Jamii ya Waswezi mkoa wa Tabora ambapo ameshika wadhfa huo akiwa ni mtu wa pili baada ya Hayati baba wa Taifa Mwalimu Julius Nyerere ambaye alitumikia nafasi hiyo enzi za uhai wake wakati wa harakati za kusaka uhuru wa Tanganyika hadi alipofariki dunia.Mwakasaka amepewa heshima ya kushika nafasi hiyo akiwa ni mtu wa pili  baada ya Mwalimu Nyerere.

Bw.Mwakasaka akikabidhiwa Usinga wa Kiswezi(kifaa cha matambiko)na mkuki ikiwa ni ishara ya kutawazwa kuwa kiongozi mlezi wa Waswezi Tabora.

RAIS KIKWETE AMPIGA KIJEMBE RAGE

 

RAIS Jakaya Kikwete amemshangaa Mwenyekiti wa Simba SC ya jijini Dar es Salaam, Ismail Aden Rage kwa kuitisha mkutano wenye ajenda moja kwa ajili ya wanachama wa klabu hiyo. Wiki iliyopita, Mwenyekiti wa Simba Rage, alitangaza kuwepo kwa mkutano wa klabu hiyo Machi 23 na kueleza wazi kuwa kutakuwa na ajenda moja ya kujadili mapungufu ya Katiba.

Akizungumza mbele ya umati wa watu waliohudhuria mazishi ya Mbunge wa Chalinze, Saidi Bwanamdogo mwishoni mwa wiki iliyopita, Rais Kikwete ambaye alifika katika eneo la makaburi, alimuuliza Mwenyekiti huyo wa Simba kuhusiana na maandalizi ya mkutano huo.

"Ndugu yangu Rage mimi Mwenyekiti mwenzio, lakini sijawahi kuona mkutano wenye ajenda moja ndio kwanza huo wa kwako, yaani wewe kiboko, pamoja na makelele yote lakini umeweza kutuliza hali ya mambo mpaka leo umedumu kuwa mwenyekiti," alisikika Rais Kikwete akisema huku mamia ya waombolezaji wakicheka.

Akizungumzia kauli hiyo ya Rais Kikwete, Rage alisema ili kuwa kiongozi imara ndani ya klabu za Simba na Yanga, inakupasa kuwa na roho ngumu, kwani bila ya kufanya hivyo wanachama watakuwa wakikuchezea kila kukicha.

"Mheshimiwa Rais kuwa kiongozi ndani ya klabu hizi mbili kunahitaji umakini sana, kwani bila ya kufanya hivyo wewe utakuwa ni kiongozi wa kupelekwa kila siku na hatimaye unamaliza muda hakuna ulichokifanya ndani ya uongozi wako," alisema Rage.

SHIRIKA LISILO LA KISERIKALI LA UINGEREZA LAKABIDHI VIFAA VYA THAMANI YA TSH.MILIONI 20 KWA MAFUNDI WADOGO

Katibu tawala mkoa wa Singida, Hassan Liana, akizungumza kwenye hafla ya kukabidhi vifaa kwa mafundi wadogo wa useremala,ushonaji wa nguo,uhunzi na ujenzi.Vifaa hivyo vyenye thamani ya zaidi ya shilingi 20 milioni,vimetolewa na shirika la Tools for self reliance la nchini Wales Uingereza na zimepitia SIDO mkoa wa Singida.

Katibu tawala mkoa wa Singida, Hassan Liana (wa pili kulia) akikabidhi cherehani kwa mmoja wa kiongozi wa vikundi 17 vilivyonufaika na msaada wa vifaa vya ufundi vilivyotolewa na shirika la Tools for self reliance la nchini Wales Uingereza.Wa kwanza kulia ni meneja wa SIDO mkoa wa Singida, Shoma Kibende.

Katibu tawala mkoa wa Singida, Hassan Liana, akiwa kwenye picha ya pamoja na viongozi wa vikundi 17 vya mafundi wa fani mbalimbali muda mfupi baada ya kuwakabidhi vifaa vya ufundi vilivyotolewa na shirika la Tools for self reliance la nchini Wales Uingereza.Wa kwanza kushoto ni mejena wa SIDO mkoa wa Singida.Shoma Kibende.(Picha na Nathaniel Limu).

 

WAAOMBA VYUO VYA SIASA KUREJESHWA

Na Lucas Raphael ,Tabora.

Wanaharakati mkoani Tabora  wamemuomba  Mwenyekiti wa Chama cha Mapinduzi CCM Mh  Jakaya Mrisho Kikwete kufanya utaratibu wa kurudisha vyuo vya siasa hapa nchini ili wananchi  hasa wanaotarajia kugombea nafasi mbali mbali za uongozi wa siasa  kufundishwa na kupigwa msasa ili kugombea nafasi hizo wakiwa na uelewa wa kutosha.

Wakiongea na waandishi wa habari jana mjini Tabora baadhi ya wanahabari hao walisema kuwa tatizo la kuwa na viongozi wasiokuwa na maadili limekuwa likichangiwa kwa kiasi kikubwa na wagombea wasiokuwa na uelewa wa kutosha  kujiingiza katika siasa na hatimaye kuwapotosha wanachi badala ya kuwaambia ukweli halisi wa mbambo yanavyokwenda.

“Siku hizi siyo kama zamani,kijana anakurupuka kutoka chuo kikuu kwa kuwa ni msomi na wala hajasoma siasa anaenda anagombea nafasi yeyote ya kisiasa na anachaguliwa ,unategemea huyu ambaye hajui siasa hata kidogo ataiambia nini jamii kama siyo kuipotosha? Na hiki dicho chanzo cha kuwapata viongozi wasiokuwa na maadili”alisema mmoja wa wanaharakati hao.

Katika hatua nyingine wanaharakati hao wameeleza kushangazwa na  kitendo cha baadhi ya wanasiasa kupinga kupongezwa kwa Waziri Mkuu mstaafu ambaye pia ni Mbunge wa Jimbo la Monduli Edward Lowassa kutokana na jitihada mbali mbali anazozifanya kwa nchi yake.

Walisema hata nchi zilizoendelea zina utamaduni wa kuwapongeza watu au viongozi waliofanya vitu vya kuigwa ila kwa nchi yetu mtu anapofanya hivyo inaonekana kama kuna nafasi ya kisiasa anayotaka kuiwania kumbe sivyo.

Bwana ,Elisha Daudi  na Deo Kahumbi walisema kuwa ni vema mtu anapostahili pongezi kupewa na kufafanua kuwa Bw Edward Lowassa alionyesha uwezo mkubwa kwa kipindi kifupi cha uongozi wake akiwa kama Waziri mkuu ikiwa ni pamoja na uanzishwaji wa sekondari za kata ambapo sasa asilimia 80 ya wanafunzi wanaomaliza shule ya msingi wanajiunga na sekondari.

Walisema kuwa wakati nchi ilipokumbwa na ukame Lowassa alisimamia kuhakikisha anachi wake wanapata msaada wa chakula hivyo kwa hayo na mengine mengi anayoendelea kufanya hana budi kupongezwa na wanaobeza kupongezwa huko wanaonyesha kutokukomaa kisiasa.

Aidha Bw,Elisha aliongeza kuwa wote  wanaofanya kazi za maendeleo  wanapaswa kupongezwa na siyo kupigwa vita na kuongeza kuwa kipindi cha uchaguzi hakijafika hivyo sasa ni kufanya shughuli za maendeleo tu na kuacha majungu.

MWISHO…………..

NHIF’ KUJENGA JENGO LA KITEGA UCHUMI TABORA

Mwakilishi wa Mkurugenzi wa mfuko wa Taifa wa Bima ya Afya NHIF ambaye pia ni kaimu Mkurugenzi wa CHF nchini  Bw.Athumani Rehani akiwasilisha salamu za NHIF katika mkutano huo wa wadau ambapo alieleza kuwa mfuko huo upo tayari kushirikiana  kwa karibu katika kuchangia Maendeleo ya mkoa wa Tabora huku ukiiomba Serikali ya mkoa huo kuwapatia eneo ambalo mfuko utawekeza kwa kujenga Jengo la Ghorofa Sita.

 

 Na Lucas Raphael,Tabora

MFUKO wa Taifa wa Bima ya Afya -NHIF, umedhamiria kujenga jengo la kitega uchumi mkoani Tabora litakalokuwa na ghorofa sita.

Hayo yalibainishwa na Mwakilishi wa Mkurugenzi Mkuu wa NHIF Rehan Athuman katika semina ya wadau mbalimbali wa mfuko huo iliyofanyika juzi katika ukumbi wa Mtemi Isike Mwana Kiyungi mkoani humo.

Alisema NHIF imekusudia kuleta mageuzi makubwa katika utoaji wa huduma za afya kwa wanachama wake hapa nchini na katika siku za usoni mfuko huo una mpango wa kujenga jengo la kisasa katika mkoa wa Tabora litakalokuwa na ghorofa sita ili kurahisisha utoaji huduma.

Aidha alisema mfuko huo umedhamiria kuboresha na kupanua wigo wa utoaji huduma za afya katika mikoa yote hapa nchini ili wanachama wake waweze kujivunia ubora wa huduma hizo sambamba na kusajili wanachama wapya kwa wingi zaidi.

Ili kuboresha huduma za mfuko wa afya ya jamii mkoani Tabora na kusogeza huduma hizo karibu na wananchi  NHIF inakusudia pia kujenga jengo la kituo cha matibabu katika Manispaa hiyo kwa lengo la kupanua wigo wa huduma hizo.

‘Mikoa mingi hapa nchini ina upungufu wa vituo vya afya, zahanati na hospitali kubwa, ndio maana tumeona ipo haja ya kujenga kituo hicho cha matibabu mkoani hapa kama ambavyo tumedhamiria kufanya katika mikoa mingine pia’, alisema.

Aidha aliuomba uongozi wa serikali ya mkoa huo kushikamana na kuongeza hamasa kwa wananchi ili waweze kujiunga na kufaidi huduma mbalimbali za kiafya zitolewazo na mfuko huo.

Mkuu wa Mkoa huo Fatma Mwassa na Mkurugenzi mtendaji wa Manispaa hiyo Alfred Luanda walimhakikishia kuwa Manispaa hiyo iko tayari kushirikiana na mfuko huo sambamba na kutoa eneo kwa ajili ya ujenzi wa jengo la kitega uchumi na kituo cha matibabu kama mfuko huo ulivyokusudia.

Luanda aliwataka viongozi wote katika Manispaa hiyo kubadilika kiutendaji kwa kuongeza ufanisi katika kazi zao badala ya kuendekeza malumbano yasiyokuwa na tija ili kukabiliana na changamoto mbalimbali zilizopo katika Manispaa hiyo.

‘Manispaa yetu haishindwi kusajili idadi kubwa ya wanachama katika mfuko wa afya ya jamii-CHF, kinachotakiwa ni kubadilika tu kiutendaji na kuanza upya uhamasishaji wa wananchi’, aliongeza.

Katika mkutano huo wajumbe walipendekeza kiwango cha mchango wa kujiunga katika huduma hizo za mfuko wa afya ya jamii kwa mwaka kiwe shilingi 10,000 kwa kichwa, gharama ambayo itamwezesha mhusika kupata huduma za afya katika kituo chochote kile mkoani humo kwa kutumia kadi maalumu ya tiba.

Mwisho

KIKAO CHA WADAU KWA AJILI YA UANZISHWAJI WA MFUKO AFYA YA JAMII TIKA MANISPAA YA TABORA

Mkuu wa mkoa wa Tabora Bi.Fatma Mwassa akifungua mkutano wa wadau kuhusu uanzishwaji wa mfuko wa afya ya jamii Tiba kwa Kadi Manispaa ya Tabora ambapo aliwataka wadau hao kuhamasisha jamii kujiunga na mfuko huo ambao utasaidia kupata huduma bora za matibabu pindi wanapougua.

Mwakilishi wa Mkurugenzi wa mfuko wa Taifa wa Bima ya Afya NHIF ambaye pia ni kaimu Mkurugenzi wa CHF nchini  Bw.Athumani Rehani akiwasilisha salamu za NHIF katika mkutano huo wa wadau ambapo alieleza kuwa mfuko huo upo tayari kushirikiana  kwa karibu katika kuchangia Maendeleo ya mkoa wa Tabora huku ukiiomba Serikali ya mkoa huo kuwapatia eneo ambalo mfuko utawekeza kwa kujenga Jengo la Ghorofa Sita.

Baadhi ya Wadau wakiwa katika ukumbi wa mkutano huo.

Meneja wa mfuko wa Taifa wa Bima ya Afya kanda ya Magharibi Bw.Emmanuel Adina akikaribisha wadau katika mkutano huo wa uanzishwaji wa mfuko wa afya ya jamii TIKA katika ukumbi wa Mtemi Isike ofisi ya mkuu wa mkoa wa Tabora.

Kutoka kushoto ni Mkuu wa wilaya ya Iramba Bw.Yahaya Nawanda na Mkuu wa wilaya ya Igunga Bw.Elibariki Kingu ambao walihudhuria katika mkutano wa wadau wa mfuko wa afya ya Jamii mjini Tabora.  

Wadau wakiwemo madiwani wa halmashauri ya manispaa ya Tabora,Watendaji kata,mitaa na vijiji Viongozi wa dini,Wazee maarufu na Wataalamu wa sekta ya Afya wakimsikiliza kwa makini Mkuu wa mkoa wa Tabora Bi.Fatma Mwassa wakati wa ufunguzi wa mkutano wa uanzishwaji wa mfuko wa Afya ya Jamii manispaa ya Tabora.

Diwani wa kata ya Malolo manispaa ya Tabora Bi.Zinduna Kambangwa ambaye alihudhuria mkutano huo wa wadau wa mfuko wa Afya ya Jamii.

Baadhi ya Maafisa wa mfuko wa Taifa wa Bima ya Afya ambao walikuwa wakihakikisha mkutano huo wa Wadau wa mfuko wa Afya ya Jamii ukiendelea vizuri katika ukumbi wa Mtemi Isike ofisi ya mkuu wa mkoa wa Tabora.

Diwani wa kata ya Kitete Bw.Daniel Mhina alihudhuria katika mkutano huo akisikiliza kwa makini mada mbalimbali zilizokuwa zikiwasilishwa ambazo zilionesha mafanikio makubwa ya mfuko wa Afya ya Jamii.

Maafisa wa mfuko wa Taifa wa Bima ya Afya walipiga picha ya pamoja na viongozi wa Serikali ya mkoa wa Tabora na wilaya ya Iramba.

NA LUCAS  RAPHAEL,TABORA.

MATIBABU KWA KADI

MKUU wa mkoa wa wa Tabora FATUMA MWASSA ameiagiza Halmashauri ya Manispaa ya Tabora ihakikishe upatikanaji wa huduma bora za  afya zinazotolewa  katika mpango wa matibabu kwa kadi TIKA zinazokusudiwa kutolewa kwenye manispaa hiyo.

Pia ametaka huduma za zitolewazo katika vituo vyote vya afya katika Manispaaya Tabora zinakuwa bora ikiwa ni pamoja na kuwepo Lugha nzuri kwa wanachama mfuko huo sanjali na upatikanaji wa dawa kwa wingi na vifaa tiba.

Mkuu huyo wa mkoa ametoa kauli hiyo wakati akifungua kikako cha wadau wa mfuko wa afya jamii mijini TIKA, katika manispaa ya Tabora kilichafanyika katika ukumbi wa Mtemi Isike Mwanakiyungi mjini Tabora.

Akizungumza katika kikao hicho, mama Mwasa amesema fedha za michango ya wanachama ni lazima zitumike kununulia dawa na kuitaka Halmashauri hiyo ihakikishe kuwa mongozo wa matumizi ya fedha hizo unafuatwa kikamilifu kwa lengo la kutimiza azima yake.

Amesema kuwa ofizi ya mkuu wa mkoa na ofisi ya katibu Tawala wa mkoa haitakubali wala hatakuwa tayari kupokea sababu yoyote ya wananchi kutopata huduma ya afya baada ya kuwa wamechangia huduma hiyo.

Mama Mwassa ameitaka Halmashauri hiyo kushirikiana na mfuko wa taifa wa bima ya afya kuendesha kampeni ya kuhamasisha wananchi ili kujiunga na mpango wa tika kwa kadi kwa lengo la kurahisisha upatikananji wa huduma za afya kwa gharama nafuu.

Mapema mkurugenzi wa CHF na kaimu mkurugenzi wa mfuko wa taifa ya bima ya afya  ,REHANI ATHUMANI amesema kuwa lengo la kuanzishwa kwa mpango huo ni kumrahisishia mwananchi kupata  huduma ya afya kwa bei nafuu.

MWISHO

MADIWANI SINGIDA WAAGIZWA KUWACHUKULIA HATUA ZA KISHERIA MAAFISA MALIASILI

Mkuu wa mkoa wa Singida, Dk.Parseko Kone, akizungumza kwenye hafla ya upandaji miti iliyofanyika katika kijiji cha Nkuninkana kata ya Puma wilaya ya Singida. Wakwanza kushoto ni mkurugenzi mtendaji wa halmashauri ya wilaya ya Ikungi,Protace Magayane,anayefuatia katibu tawala mkoa wa Singida, Liana Hassan na mkuu wa wilaya ya Ikungi,Manju Msambya. tatu kutoka kushoto (waliokaa). Jumla ya miti 2,200 ilipandwa kwenye siku ya uzinduzi upandaji Miti kwa mkoa wa Singida,unaotarajia kupanda miti ya aina mbalimbali zaidi ya milioni moja.

Mkuu wa mkoa wa Singida, Dk.Parseko Kone, akishiriki kupanda miti kwenye siku ya upandaji miti kimkoa iliyofanyika katika kijiji cha Nkuninkana kata ya Puma wilaya ya Ikungi.

Mkurugenzi mtendaji wa halmashauri ya wilaya ya Ikungi, Protace Magayane, akishiriki kupanda miti kwenye siku ya uzinduzi wa upandaji miti kimkoa uliofanyika katika kijiji cha Nkuninkana kata ya Puma wilaya ya Singida.(Picha na  Nathaniel Limu).

.wengi wa maafisa hao wanajihusisha na biashara haramu ya mkaa

Na Nathaniel Limu, Ikungi

 

MADIWANI wa Halmashauri ya Wilaya ya Manispaa ya Singida wameagizwa kuwachukulia hatua kali za kisheria maafisa maliasili watakaobainika wanasaidia kuendeleza biashara ya mkaa.

Agizo hilo limetolewa na Mkuu wa Mkoa wa Singida,Dk.Parseko Kone wakati akizungumza kwenye uzinduzi wa upandaji Miti kimkoa uliofanyika kwenye kijiji cha Nkuninkana kata ya Puma wilaya ya Ikungi.

Amesema pamoja na kupigwa marufuku kwa biashara ya mkaa mkoani humu,biashara hiyo inayotishia mkoa kugeuka kuwa jangwa,bado imeendelea kushamiri hasa katika wilaya ya Ikungi na Manyoni.

“Hapa wilaya ya Ikungi katika vijiji vya Mkiwa na Issuna,biashara ya mkaa inafanyika kwa kiwango cha kutisha na maafisa misitu wa ngazi mbalimbali wakiangalia bila kuchukua hatua zo zote za kukomesha biashara hii”,amesema Dk.Kone.

Mkuu huyo wa mkoa,amesema ili mapambano dhidi ya biashara ya mkaa yaweze kufanikiwa ni kuwaondoa maafisa maliasili wanaosaidia kuendelea biashara hiyo haramu na kuweka wengine wenye moyo wa kukomesha biashara ya mkaa.

Katika hatua nyingine,Dk.Kone amewataka wanakikundi cha nyumba ya nyuki cha kijiji cha Nkuninkana,kuhakikisha kinapanda miti mingi ya maua kwa ajili ya chakula cha nyuki waliopo kwenye shamba lao.

“Hakikisheni bwawa lenu la maji linakuwa na maji ya kutosha kipindi chote.Nyuki bila kuwepo kwa maji na maua ya kutosha ni lazima watahama”,alitahadharisha.

Kikundi hicho kinachojishughulisha na ufugaji nyuki wakubwa (mizinga 123) na wadogo mizinga mitatu,kimezawadiwa  shilingi laki tatu na mkuu wa mkoa wa Singida shilingi laki tatu na mkuu wa wilaya ya Ikungi,Manju Msambya,amekichangia shilingi laki mbili.

POLISI WAUA RAIA ULYANKULU TABORA KWA RISASI,WAJERUHI MMOJA

Askari  Polisi wa kituo kidogo cha Tarafa ya Ulyankulu wilayani Kaliua mkoani Tabora wamemuua kwa kumpiga risasi  begani  kijana mmoja aliyefahamika  kwa jina la John Joseph(28)  kwa tuhuma  za kuleta vurugu na kutaka kuchoma  moto  Kituo hicho cha Polisi,wakiwashurutisha  askari  hao kumwachia  mtuhumiwa  mmoja  wa wizi  wa ng’ombe ili waweze  kumwadhibu  wenyewe.

Kamanda wa Polisi mkoa wa Tabora ACP Peter Ouma amethibitisha kutokea kwa tukio hilo ambapo amelieza mtanzania kuwa marehemu John Joseph juzi majira ya saa tano asubuhi akiwa na wananchi wengine walimkamata kijana mmoja  Shija Matenga(23)kwa tuhuma za kuiba ng’ombe watano huko wilayani Kasulu mkoani Kigoma ambaye aliwaswaga hadi eneo la Ulyankulu wilayani Kaliuawa ambako alikamatwa na kuanza kupigwa.

Ouma alifafanua kuwa  wakati kundi la wananchi hao ambao  miongoni mwao akiwemo  marehemu  Joseph  wakiendelea kumshambulia  mtuhumiwa huyo wa wizi wa mifugo  Shija  Matenga,askari  Polisi wa kituo  hicho  cha  King’wangoko  kilichopo tarafa ya Ulyankulu chini ya uongozi  wa mkuu wa Kituo  hicho namba  E.1295 D/SGT  KIMOLA  walipata taarifa hiyo na hivyo askari wawili waliagizwa  kufika eneo la tukio kujaribu kuwazuia  wananchi hao ambao tayari walikwisha mfunga kamba mtuhumiwa huku wakikusanya majani kwa lengo la kutaka kumchoma moto.

Kwa mujibu wa Kamanda Ouma baada ya askari  hao  kufanikiwa kumuokoa mtuhumiwa  walimfikisha kituoni  wakati  kundi  la  wananchi  hao  likiwafuatilia kwa nyuma wakiwa wanawarushia mawe,chupa na fimbo  askari  Polisi hao ambao  nao  wakalazimika  kujikinga kwa kufyatua risasi iliyompata John Joseph  begani  na hatimaye kufariki dunia hatua chache kutoka Kituoni hapo.

Katika sakata hilo lililodumu kwa muda mfupi  Malembeka Matemele(22)ambaye ni mkazi wa Ulyankulu alipigwa risasi paja la mguu wa kulia huku kamanda Ouma akimtaja kuwa ni mmoja kati ya vinara wa vurugu hizo zilizosababisha mauaji ya mtu mmoja.

Hata hivyo baadhi ya wananchi wa tarafa ya Ulyankulu ambao hawakutaka majina yao yatajwe hadharani wamelitupia lawama Jeshi la Polisi kwa kufanya mauaji hayo ya raia asiyekuwa na hatia.

Wamesema wakati wa purukushani hizo  zikiendelea  marehemu John alipigwa risasi akiwa anatokea nyumbani kwake hatua ambayo wamelitafsiri tukio hilo kuwa ni la kinyama na huku wakiziomba taasisi zinazotetea haki za binadamu kufuatilia na kuchunguza ukweli wa tukio hilo la maonezi.

DC IRAMBA AWAFUNDA MADIWANI WA MANISPAA YA TABORA KUHUSU MFUKO WA AFYA YA JAMII

 

Mkuu wa wilaya ya Iramba Bw.Yahaya Nawanda akizungumza katika mkutano wa wadau kuhusu uanzishwaji wa mfuko wa Afya ya Jamii Manispaa ya Tabora,mkuu huyo ameshiriki katika mkutano huo kwa lengo la kutoa maelezo namna Wilaya yake ilivyofanikiwa kuihamasisha Jamii kuchangia mfuko huo unaotoa huduma ya Afya kwa kutumia Kadi katika hospitali,zahanati na vituo vya afya vinavyomilikiwa na halmashauri.

Baadhi ya wadau wakiwemo Watendaji wa mitaa,Kata na vijiji wakimsikiliza kwa makini mkuu wa wilaya ya Iramba ambapo pia aliwataka Madiwani kusaidiana na Watendaji hao kuhamasisha Jamii iweze kujiunga na Mpango huo wa Tiba kwa Kadi(TIKA)

Mkuu wa wilaya ya Tabora Bw.Suleiman Kumchaya,Mwakilishi wa mkurugenzi wa NHIF Taifa Bw.Athuman Rehani na mkuu wa wilaya ya Igunga Bw.Elibariki Kingu wakimsikiliza kwa makini mkuu wa wilaya ya Iramba katika mkutano huo wa wadau.

''Madiwani wasaidieni wananchi kujenga uchumi wao ili iwe rahisi kuwahamasisha kuchangia mfuko wa Afya ya Jamii hatua ambayo pia itawasaidia kuwajengea mazingira mazuri ya kurejea kwenye nafasi zenu kwenye uchaguzi  mkuu  wa 2015"Alisema  Bw.Nawanda.

Wadau waliendelea kuwa makini kusikiliza mada mbalimbali zilizokuwa zikitolewa na maafisa wa NHIF/CHF.

WAKULIMA WA TUMBAKU KISANGA WATENGA MIL 5.1 KUWEKA UMEME KIJIJINI

Viongozi wa Chama cha Msingi cha wakulima wa Tumbaku Kisanga, kutoka kushoto ni mwenyekiti wa chama hicho Rashid Mazinge akifuatiwa na diwani wa kata hiyo Abdallah Msumeno (Picha na Alan Mtana)

Na Allan Ntana, Sikonge

CHAMA Cha Msingi cha Wakulima wa Tumbaku katika kata ya Kisanga
wilayani Sikonge mkoani Tabora kimetenga sh 5,100,000 za mauzo ya
tumbaku kwa msimu wa 2013/2014 kwa ajili ya kutunisha mfuko maalumu wa
kuweka umeme katika kata hiyo yenye vijiji 3.

Hayo yalibainishwa na Mwenyekiti wa Chama hicho Rashid Mazinge, katika
taarifa yake kwa waandishi wa habari waliotembelea kijiji hicho wiki
iliyopita.

Alisema chama hicho chenye jumla ya wanachama 700 kimekusudia kuweka
umeme katika makao makuu ya kata hiyo yaliyoko katika kijiji cha
Kisanga na vijiji vyake na kwa kuanzia wameanzisha mfuko maalumu wa
umeme kwa ajili ya kutimiza lengo hilo.

Aidha alisema wametenga kiasi hicho cha fedha kwa ajili ya maandalizi
ya awali ambapo wataanza kwa kununua vifaa mbalimbali vya umeme
ikiwemo vifaa vya komputa na printa vitakavyosaidia kurahisisha
shughuli mbalimbali za ki-ofisi katika ofisi ya chama hicho, tayari
komputa kadhaa zimeshanunuliwa.

‘Ndugu waandishi wa habari, tumekusudia kuweka umeme katika kijiji
chetu ndio maana tumeanza kukusanya fedha na kuzitunza kama
wanakikundi, mda si mrefu tutaenda wilayani kufuatilia taratibu
zingine, tunaomba na ninyi mtusaidie huko wilayani ili tufanikiwe
haraka’, alisema.

Alibainisha kuwa chama kimefikia hatua hiyo baada ya kupata mafanikio
makubwa katika msimu wa 2012/2013 na 2013/2014 hali iliyowafanya
wanachama wake kwa kauli moja kuridhia haja ya kuanzishwa mfuko huo
ili kujiletea maendeleo katika kata hiyo yenye vijiji 3 (Utyatya,
Mwamayunga na Kisanga).

Katika msimu wa 2012/2013 chama hicho kilizalisha jumla ya kilo
940,049 za tumbaku zenye thamani ya Dola za kimarekani 2,538,132 (sawa
na sh bil 4.1) na mapato ya ushuru yalikuwa dola za kimarekani 65,000
(sawa na sh mil 103.4), kwa mapato hayo waliweza kulipa deni la
pembejeo la dola 692,000.(sawa na sh bil 1.1) kutoka benki ya NMB na
kubakiwa na fedha ya kutosha.

Aidha katika msimu wa 2013/2014 walilenga kuzalisha jumla ya kilo
1,400,000 zenye thamani ya Dola 3,920,000 sawa na sh bilioni 6.3 na
mapato ya ushuru walilenga kukusanya dola 98,000 sawa na sh mil 156.8
hali ambayo itawawezesha kulipa deni la pembejeo dola 968,000 sawa na
sh bil 1.5 toka NMB.

Alitaja mafanikio ya chama hicho kuwa ni kuanzishwa mfuko wa ujenzi wa
ghala la kuhifadhia tumbaku ambao umetengewa kiasi cha Dola 31,000 (sh
mil 49.3), ujenzi wa ofisi ya kata ambapo chama hicho kimechangia sh
mil 3, kuanzisha mfuko wa umeme, kuanzisha KISANGA SACCOS LTD ambayo
mpaka sasa ina jumla ya Dola 21,000 (sawa na sh mil 33,495,000).

Alisema chama hicho kimedhamiria kufanya mambo makubwa ya kimaendeleo
kupitia vikao mbalimbali vya wanachama wake ambapo kimetenga sh
milioni 30 kwa ajili ya ununuzi wa gari aina ya FUSO ili kurahisisha
huduma mbalimbali za wakulima kijijini hapo, pia kimekusudia kukusanya
Dola 84,000 (sh mil 134,000,000) ili kuongeza nguvu ya SACCOS yao.

Pamoja na mafanikio hayo zipo changamoto kadhaa zinazowakabili ikiwemo
mikopo na bei kubwa za pembejeo, ucheleweshaji na upatikanaji wa
pembejeo hizo, kutokuwa na umeme, ubovu wa barabara zinazounganisha
vijiji hivyo, ukosefu wa maji safi na salama, ukosefu wa nyumba ya
mganga wa zahanati na kituo cha polisi.

Diwani wa kata hiyo Abdallah Msumeno mbali na kupongeza hatua ya chama
hicho kutenga sh mil 2 kwa ajili ya kununua viti 100 vya plastic na
kutenga sh 576,000 za michango ya wanachama katika mfuko wa NSSF pia
ametoa wito kwa wakulima hao kufuata kalenda ya msimu wa kilimo ili
kupata mafanikio zaidi.