WANANCHI WENYE HASIRA WACHOMA NYUMBA TANO ZA MTU ANAYEDAIWA KUWA NI JAMBAZI SUGU POLILSI WAWATAWANYA KWA RISASI.

NA LUCAS RAPHAEL,TABORA

 

Wananchi wa wenye hasira katika kata ya Igurubi wilayani Igunga mkoani Tabora, wameyakimbia makazi yao kwa ajili ya kukwepa kukamatwa na jeshi la polisi baada ya kutuhumiwa kuchoma nyumba tano za mtu anayedhaniwa kuwa ni jambazi sugu.

Wakizungumza kwa nyakati tofauti juzi baadhi ya wananchi Richard Ngilya na Amosi Makeleja walisema kuchomwa kwa nyumba hizo tano kumesababishwa na jeshi la polisi wilaya ya Igunga kuwakamata wananchi wanane (8) wa kata hiyo huku wakiendelea kumlinda jambazi huyo.

Aidha Ngilya alidai kuwa kilichowashangaza wananchi ni kitendo kiilichofanywa na jeshi la polisi kwenda katika kata hiyo majira ya saa saba usiku pasipo kutaarifu uongozi uliopo na kuanza kuwafunguza huku wakiwalazimisha wakimama kuwaonyesha waume zao ambao hawajafanya kosa la uchomaji nyumba.

Mwenyekiti wa kitongoji cha Mwakwangu kilichopo katika kata hiyo Luhende Swala alisema askari hao waliingia katika kitongoji chake bila kumtaarifu yeye ambapo waliwakamata baadhi ya wananchi wa kitongoji hicho na kuondoka nao.

Aliendelea kusema baada ya kubebwa wananchi hao ndipo wananchi walishikwa na hasira na kujikusanya na kwenda kuchoma nyumba tatu za matembe  ambazo jambazi huyo alikuwa amewajengea ndugu zake huku idadi ya nyumba zilizochomwa zikifika tano.

Aliongeza kuwa baada ya kuchomwa nyumba hizo tatu kundi la wananchi hao lilielekea katika nyumba za baba yake na jambazi huyo kwa ajili ya kwenda kuzichoma lakini muda mfupi polisi wa kituo kidogo Igurubi walifika na kuanza kufyatua risasi za moto zilizasaidia kuwatawanya wananchi

Naye Mtendaji wa kata ya Igurubi Mdeka Said alibainisha kuwa kuchomwa kwa nyumba hizo kumetokana na baadhi ya wananchi kukamatwa na polisi kufuatia tukio la kuchomwa nyumba za jambazi huyo mwishoni mwa mwaka 2014 aliongeza kuwa hadi sasa ni nyumba tano zilizochomwa huku akifafanua nyumba mbili za bati na tatu za matembe ambapo hakutajwa thamani ya nyumba zote.

Mtendaji huyo alitaja majina ya wananchi walikamatwa Mbeshi Reuben, Shija Jilala, Ng’ombe Igoye, Masesa Pamba, Martin Charles, Lushuminkono Maige, Emmanuel Mwizamhindi, Mwandu Shusha alisema kitendo cha kukamatwa wananchi hao kimeleta mtafaruku mkubwa katika kata ya Igurubi.

Diwani wa kata ya Igurubi ,Edson Sadani alikiri kukamatwa kwa wananchi wake na kusema kuwa kitendo kilichofanywa na polisi sio cha kiungwana kwa kuwa hawakushirikisha uongozi wowote hata walipomaliza kuwakamata wananchi wake.

“Mimi kama diwani wa kata hii natambua Mahona Malendeja ni miongoni mwa majambazi ambao wamekuwa wakiisumbua kata ya Igurubi kwa kuwapora wananchi lakini cha ajabu polisi wameendelea kumlinda mtu huyo huku wakiwakamata wananchi ambao hawana hatia” alisema

Akijibu tuhuma hizo Mahona Malendeja akiwa kituo cha polisi Igunga huku akivinjari bila mashaka alisema yeye sio jambazi wala hajawahi kupatikana na shitaka lolote linalohusu ujambazi.

Alisema kilichosababisha nyumba zake kuchomwa moto ni sababu ya kumwonea wivu wa kibiashara aliongeza kuwa yeye amekuwa mfanyabiashara mkubwa anayeuza mafuta ya petrol, diesel ikiwa ni pamoja na kununua ngozi sambamba na mazao mchangannyiko ikiwa ni pamoja na kuwakopesha wananchi kwa riba.

Kwa upande kamanda wa polisi kamishna msaidizi mkoa wa Tabora Suzana Kaganda alidai kuwa yuko likizo hivyo hawezi kuzungumzia kitu chochote naomba umpigie kamanda aliyepo mimi nipo likizo.

Hata hivyo juhudi za kumpata Kaimu kamanda wa polisi Juma Bwile alisema kuwa mpaka sasa hajapata taarifa zozote zinazohusiana na tukio hilo ila anafuatilia leo.

 

MWISHO:

UKOSEFU WA KAZI KWA VIJANA NI JANGA LA DUNIA

Mkurugenzi Mtendaji wa Umoja wa Vilabu vya Waandishi wa Habari (UTPC), Abubakar Karsan akionyesha gazeti la "Tuwasiliane" linalochapishwa na UTPC na kusambazwa kwa wadau na maeneo mbalimbali ya jijini Mwanza kwa Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez aliyetembelea makao ya ofisi hizo kwa ajili ya mazungumzo na kuboresha ushirikiano baina ya Umoja wa Mataifa Umoja huo wa vilabu vya waandishi wa habari nchini.

Na Mwandishi Wetu

WIMBI kubwa la kuwa na vijana wasiokuwa na kazi limeelezwa kuwa tatizo duniani kote na serikali mbalimbali zinatakiwa kuliangalia hilo kwa undani na kulitatua.

Kauli hiyo imetolewa na Mratibu wa Mkazi wa Mashirika ya Umoja wa Mataifa nchini na Mwakilishi wa shirika la maendeleo la Umoja wa Mataifa (UNDP), Alvaro Rodriguez.

Mratibu huyo alisema hayo katika mazungumzo yake na Mkurugenzi Mtendaji wa Umoja wa Vilabu vya Waandishi wa Habari (UTPC) Abubakar Karsan.

Alisema ukosefu wa kazi kwa sasa ni tatizo la kijamii na kwamba, shauri hilo lisipoangaliwa kwa makini linaweza kuwa chanzo cha matatizo makubwa ya usalama na amani katika taifa.

Alvaro Rodriguez ambaye alifika katika ofisi za UTPC kuangalia mambo yanayofanyika katika ofisi hiyo wakati akiwa ziarani Mwanza wiki iliyopita, alisema kama tatizo la ajira litaendelea kuwapo, vijana wanaoathirika wanaweza kufikiria njia nyingine isiyo ya kistaarabu kufanikisha mambo yao.

Mkurugenzi Mtendaji wa Umoja wa Vilabu vya Waandishi wa Habari (UTPC), Abubakar Karsan akizungumza na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (kushoto) aliyeambatana na Mshauri wa masuala ya haki za binadamu kutoka ofisi ya mratibu mkazi wa UN Tanzania, Bi. Chitra Massey (kulia) alipotembelea makao makuu ya ofisi hizo jijini Mwanza.

Alisema Umoja wa Mataifa unaendelea kushirikiana na serikali mbalimbali kuhakikisha kwamba tatizo la ajira kwa vijana linamalizwa ili jamii isiingie katika mtafaruku utakaokosesha amani na usalama na hivyo kusimamisha maendeleo yaliyofikiwa katika jamii.

Bila kutaja makundi ya kigaidi yanayotikisa dunia kwa sasa kama Al - Qaeda na washirika wake Boko Haram, Al - Shabab, Islamic State of Iraq na Levant (ISIL) alisema makundi mengi ya kigaidi duniani yanatokana na vijana kutojua wafanye nini na mazingira waliyonayo na hivyo kuwa rahisi kushawishika.

Alisema makundi ya hatari mara nyingi ni ya vijana ambao wanashindwa kupata riziki au hawajui wafanye nini kupata riziki na serikali zimewaacha bila kuwaangalia.

Aidha alisema Umoja wa Mataifa utaendelea kusaidia kuhakikisha kwamba masuala muhimu yanayowezesha maendeleo kama demokrasia yanazingatiwa ili kuiwezesha jamii kufanya maamuzi sahihi ya vile wanavyotaka kupanga maendeleo yao.

Mtaalam wa Mahusiano na Mawasiliano wa Umoja wa Mataifa (UN) Tanzania, Hoyce Temu (kulia) akichangia jambo wakati wa mazungumzo na Mkurugenzi Mtendaji wa Umoja wa Vilabu vya Waandishi wa Habari (UTPC) Abubakar Karsan makao makuu ya ofisi za umoja huo jijini Mwanza.

Alisema Demokrasia huwezesha wananchi kujua namna wanavyoweza kutengeneza mustakabali wao katika masuala ya ustawi wa jamii na maendeleo huku haki zao za msingi zikilindwa.

Mapema Mkurugenzi Mtendaji wa UTPC, Bw. Karsan alimwambia mratibu huyo mambo ambayo yamefanywa na umoja huo na changamoto walizokumbana nazo kwa kuzingatia mpango mkakati wake wa mwaka 2011-2013.

Umoja huo ambao ulianzishwa mwaka 1996 na kusajili na wizara ya mambo ya ndani kama taasisi isiyokuwa ya kiserikali (NGO) mwaka uliofuata, umefanikiwa kuanzisha mfuko wa kusaidia vyombo vya habari kwa jina la Daudi Mwangosi, aliyekuwa Mwenyekiti wa Klabu ya waandishi wa habari wa Iringa (IPC).

Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez akizungumza na Mkurugenzi Mtendaji wa Umoja wa Vilabu vya Waandishi wa Habari (UTPC), Abubakar Karsan wakati wa mazungumzo ya kuboresha mahusiano baina ya mashirika ya umoja wa mataifa na umoja wa vilabu vya waandishi wa habari nchini Tanzania.

Aidha alimwambia kwamba wamefanikisha mafunzo ya kuongeza umahiri wa uandishi wa habari na pia kuwaelezea umma juu ya uhuru wa vyombo vya habari.

Pia alielezea mafanikio yaliyopatikana katika kampeni za kuelimisha umma na kuelewana miongoni mwa wadau mbalimbali wa sekta ya habari.

Alisema hata hivyo bado wanaendelea na kampeni yao kutaka mabadiliko ya malipo kwa waandishi wa habari wanaojitegemea ambao ndio wanatoa mchango wa asilimia 75 hadi 80 za habari zinazotangazwa au kuchapishwa.

Aidha wanaendelea kutoa mafunzo ya kanuni na maadili kwa waandishi wa habari na kuendelea kukabiliana na tatizo la usalama katika mpango mkakati wa mwaka 2015 – 2019.

Katika ziara hiyo ya kanda ya Ziwa, mratibu huyo aliambatana na mshauri mwandamizi wa masuala ya haki za binadamu Dk Chitralekha Massey na Mtaalamu wa mawasiliano wa umoja huo hapa nchini HoyceTemu.

SIKONGE WAMPONGEZA RAIS KIKWETE KWA JITIHADA ZAKE ZA KUPUNGUZA UMASKINI

 

Washiriki wa warsha ya kunusuru kaya maskini iliyoandaliwa na Mfuko wa Maendeleo ya Jamii TASAF wilayani sikonge mkoani Tabora,wa kwanza kulia na mbunge wa jimbo la Sikonge Juma Nkumba anayefuata ni kaimu mkurungezi wa Tasaf Peter lwanda na wa kati kati ni mkuu wa walaya ya Dikonge Hanifa Selengua. aliyakaa kulia kwa mkuu wa wilaya ni Mwenyekiti wa Halmashauri ya wilaya ya Sikonge na aliyevaa suti nyeusi ni Mkurungezi mtendaji wa wilaya ya Sikonge Shadrack Mhagama

HALMASHAURI ya wilaya ya Sikonge mkoani Tabora imempongeza Rais Jakaya Mrisho Kikwete kwa jitihada na dhamira yake ya dhati ya kupambana na umaskini hapa nchini kupitia mpango wa kuzinusuru na kuziwezesha kaya maskini kiuchumi.

Pongezi hizo zimetolewa juzi na Mwenyekiti wa halmashauri ya wilaya hiyo Robert Kamoga alipokuwa akihitimisha warsha ya kujenga uelewa wa wadau kuhusu mpango wa kunusuru kaya maskini unaoasisiwa na Mfuko wa Maendeleo ya Jamii (TASAF) awamu ya tatu.

Alisema uongozi wa Rais Jakaya Kikwete umeimarisha zaidi dhamira ya nchi kupunguza umaskini kupitia mikakati yake mbalimbali na kuboresha upatikanaji wa huduma za kijamii ambazo ni pamoja na elimu, afya na maji kwa ushirikiano mkubwa na wananchi.

‘Nachukua nafasi hii kumpongeza Rais wa Jamhuri ya Muungano wa Tanzania Mhesh.Dr Jakaya Mrisho Kikwete kwa uongozi wake ambao umeonyesha dhamira ya dhati ya nchi hii kupunguza umaskini wa wananchi sambamba na kuboresha huduma za kijamii’, alisema Kamoga.

Alisema kitendo cha Rais Kikwete kuzindua Mpango maalumu wa Kunusuru Kaya Maskini mnamo tarehe 15 Agosti 2012 kule Dodoma na utekelezaji wake kuanza mara moja mwezi Februari 2013 kwa azma ya kufikia jumla ya halmashauri 161 za Tanzania Bara, Unguja na Pemba kililenga kutokomeza na kundokana na umaskini katika kaya husika sambamba na utekelezaji wa miradi mingine kwa nia ya kuzipatia kaya maskini uwezo wa kujikimu.

Kamoga alibainisha kuwa madhumuni ya mpango huu wa awamu ya tatu ya TASAF ni kuwezesha kaya maskini kuongeza kipato, fursa na uwezo wa kugharamia mahitaji yao muhimu na familia zao mpango ambao utatekelezwa kwa awamu katika kipindi cha miaka 10. 

Aidha aliwakumbusha wanawarsha kuwa TASAF ni chombo cha serikali kilichopewa jukumu la kuwezesha kufikia azma ya serikali ya kupunguza umaskini kama ilivyoainishwa katika awamu ya pili ya MKUKUTA kwa kutumia dhana ya ushirikishwaji jamii.

Aliongeza kuwa tangu nchi yetu ipate uhuru miaka 50 iliyopita, serikali imekuwa ikipambana na maadui watatu ambao ni umaskini, ujinga na maradhi lengo likiwa kumwondolea mwananchi kero na vikwazo mbalimbali vya kimaendeleo.

Kamoga alieleza kuwa serikali kwa kutambua kwamba umaskini bado ni mkubwa miongoni mwa jamii hasa kule vijijini, ndio maana imeandaa Mpango huu wa Kunusuru Kaya Maskini ili kufikia malengo yake iliyoazimia katika Mkakati wa Kukuza Uchumi na Kupunguza Umaskini Tanzania (MKUKUTA ) awamu ya pili.

Awali akizungumza katika warsha hiyo Mwakilishi wa Mkurugenzi Mtendaji wa TASAF Bw.Peter Luanda alisema mpango huo wa kunusuru kaya maskini umelenga kuzinufaisha kaya masikini zilizo katika hali duni kule vijijini na katika mitaa mbalimbali hususani watoto wenye umri chini ya miaka 5 na wanaosoma shule na akina mama wajawazito.

 Alisema kaya hizo zitanufaika kwa kupewa ruzuku za aina mbili moja ni ruzuku ya msingi itakayotolewa kwa kaya maskini iliyomo kwenye mpango huo na ruzuku ya pili walengwa ni wale wanaotakiwa kutimiza masharti ya elimu na afya ili waweze kupatiwa huduma za elimu na afya bure.

Akizungumza baada ya warsha hiyo, Mkurugenzi Mtendaji wa halmashauri ya wilaya Sikonge Shadrack Mhagama alipongeza ujio wa mpango huo wa TASAF wa kunusuru kaya maskini na kuongeza kuwa utasaidia kuboresha maisha ya wananchi wake kwani wengi wao wamekuwa wakishindwa kuchangia hata shughuli za maendeleo kutokana na kuwa na hali duni.

SERIKALI YATAKIWA KUKOMESHA UBABE KWENYE UKEKETAJI

Mratibu wa kituo cha TFGM na Mwalimu Mkuu wa Shule ya Mtakatifu Catherine Laboure ya Kijiji cha Masanga kilichopo wilayani Tarime mkoani Mara, Thomas Maruga akiwatembeza maeneo mbalimbali ya shule hiyo na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (kulia) na Mwakilishi wa Shirika la Umoja wa Mataifa linaloshughulikia Idadi ya watu duniani (UNFPA), Dkt. Natalia Kanem (kushoto) wakati wa sherehe ya mahafali ya sita ya mabinti waliokwepeshwa msimu wa ukeketaji (Waiseke wa Kisasa).(Picha za Zainul Mzige wa MOblog).

Na Mwandishi wetu, Tarime-Mara

SERIKALI imeombwa kuhakikisha inakomesha ubabe unaotumika kukeketa mabinti wa koo za Kikuria nchini.

Kauli hiyo imetolewa na Mkurugenzi wa Kituo cha kupambana na ukeketaji cha Masanga, Tarime Sista Germaine Baibika akizungumza na waandishi wa habari baada ya kukamilika kwa sherehe ya mahafali ya sita ya mabinti waliokwepeshwa msimu wa ukeketaji.

Alisema jumla ya mabinti 634 wamehitimu mafunzo ya miezi miwili yanayogusa haki za binadamu, haki zao, masuala ya afya na kuzitambua na kuezinzi mila nzuri.

Aidha wamejifunza kazi za sanaa na usanii.

Alisema adha kubwa wanayokumbana nayo mabinti hao waliotoka katika kituo hicho ni kukamatwa kwa nguvu na kupitishwa kisu cha Ngariba bila wao wenyewe kuafiki kwa dai la kuendeleza mila.

“Hii sio mila” anasema sista Germaine na kuongeza kuwa hakuna mila inayotengenezwa kunyanyasa watu wengine au kulazimisha mambo yasiyofaa katika jamii, mila hiyo ikiwepo lazima ipigwe vita.

Mgeni rasmi Waziri wa Kazi na Ajira, Mh. Gaudentia Kabaka (wa pili kushoto) akiwasili kwenye mahafali hayo pamoja na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (kushoto) aliyeambatana na Mwakilishi wa Shirika la Umoja wa Mataifa linaloshughulikia Idadi ya watu duniani (UNFPA), Dkt Natalia Kanem.

Alisema serikali isiache kuwatetea mabinti hao kwa dai la kuwa hiyo ni mila kwa kuwa wanaofanyiwa vitendo hivyo hulazimishwa na haifanyiki kwa ridhaa yao.

Alisema wapo mabinti walioletwa na wazazi wao kuepushwa na janga hilo, wapo waliotoroka kwa wazazi wao na wapo walioletwa katika kituo hicho na polisi kutoka makwao.

Mafunzo hayo ya mwezi mmoja yamelenga kukabiliana na msimu wa ukeketaji ambao sisita huyo alisema mwaka jana ulianza mapema Novemba na unaendelea hadi mwaka huu wakati kimila mwaka huu si wa ukeketaji.

Kwa mujibu wa mila za Kikuria ukeketaji hufanyika katika mwaka unaogawanyika, mwaka 2015 haugawanyiki.

Mhashamu Askofu Mkuu wa Kanisa Katoliki Jimbo la Musoma Mkoani Mara, Michael Msongazila akiwasili kwenye sherehe za mahafali ya sita ya kituo cha kupambana na ukeketaji Masanga wilayani Tarime mkoani Mara.

Mafunzo hayo ambayo yamelenga kuwatoa mabinti wa kisasa wenye mwelekeo wa maisha yenye hali bora mabinti wanaofika hapo huwa hawataki kukeketwa na ndio maana mwaka huu walipata tatizo la binti mmoja kuzimia wakati alipomuona baba yake katika maeneo ya kituo hicho.

Alisema wapo wazazi wakorofi wanaokuja kudai watoto wao lakini pia ipo jamii korofi inayotumia ubabe baada ya wasichana hao kutoka hapo wanakeketwa kwa lazima.

Katika hafla hiyo iliyoendeshwa na masista wa shirika la Daughters of Charity of St. Vincent De Paul, Waziri wa Kazi na Ajira Mh. Gaudentia Kabaka aliwapongeza wasichana hao na kuwataka kuwa mfano katika jamii na kutekeleza wajibu wao.

Alisema wamekuwa mabinti wa kisasa kwa kukataa ukeketaji na hivyo wao wanastahili kuwa walimu kwa wenzao.

Maandamano ya wanafunzi wa Shule ya Mtakatifu Catherine Laboure iliyopo kijiji cha Masanga wilayani Tarime, mkoani Mara wakiwa na mabango yenye jumbe mbalimbali za kukemea ukeketeji wakisindikiza dada zao wahitimu wa kituo cha FGMT katika sherehe ya mahafali ya sita ya mabinti (Waiseke wa kisasa) waliokwepeshwa msimu wa ukeketaji yaliyofanyika mwanzoni mwa wiki.

Aidha Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez amewataka mabinti hao kuwa chachu ya mabadiliko katika jamii na kuwa chanzo cha kubadili kizazi kijacho.

Alisema wamesimama madhubuti kupinga mila potofu na uonevu na kusema kwa kitendo chao wamewafanya wengine kuwaiga na kubadilika.

Alisema ukeketaji ni mila potofu na kusema kwa msaada wa shirika la Umoja wa mataifa la Mpango wa familia (UNFPA) na taasisi nyingine zinazopambana na ukeketaji kwa kipindi cha miaka saba wamefanikiwa kuwoakoa wasichana 2001 wasikeketwe.

Aidha mabinti hao wameokolewa dhidi ya ndoa za utotoni, ujauzito wa mapema na kushindwa kuendelea na masomo.

Naye Mwakilishi wa Shirika la Umoja wa Mataifa linaloshughulikia Idadi ya watu duniani (UNFPA), Dkt Natalia Kanem amesema ni vyema mapambano dhidi ya ukeketaji yakaendelea kwa kuwa wanaoshabikia ni viongozi wa kimila na ngumu kuiondoa ila kwa juhudi za jamii yenyewe.

Katika sherehe hizo ambapo pia askofu wa Musoma alikuwepo na viongozi wengine wa kiserikali pia Ngariba walioacha kazi hiyo walikuwepo kuelezea ubaya wa mila hiyo.

Suala la ukeketaji ni kitu cha kawaida katika mikoa ya Manyara 71%, Dodoma 64%, Arusha 57%, Singida 51% na Mara 40%.

Viongozi waliopata muda wa kuzungumza walisema kwamba ukeketaji unatakiwa kukomeshwa mara moja kwani ni tatizo si tu kwa jamii bali kwa wale ambao wanafanyiwa kisaikolojia na kitabibu.

Wahitimu mabinti 37 waliokwepeshwa msimu wa ukeketaji wa kituo cha TFGM cha kijiji cha Masanga wakiwasili na maandamano kwenye sherehe za mahafali ya sita ya kituo hicho.

Moja ya kazi inayoifanywa na kituo cha Masanga ni ushauri wa kisaikolojia kutokana na wasichana wengi kufika hapo wakiwa na matatizo makubwa ya magonjwa na hasa msongo wa mawazo.

Katika risala yao mabinti hao wameitaka serikali kufanyakazi yake kukabiliana na ubabe unaofanywa na viongozi wa kimila wa kuwalazimisha kukeketwa hata msimu unapokuwa umepita.

Mabinti hao ambao wengi wametoka shule ya msingi na sekondari wameweza kuwekwa hapo kwa msaada wa UNFPA ambao wametoa hela kupitia Children’s Dignity Fund (CDF), .Wafadhili wengine ni Daughters of Charity of St. Vincent Du Paul, na Askofu wa kanisa katoliki dayosisi ya Musoma, Michael Msongazila

Mgeni rasmi Waziri wa Kazi na Ajira Mh. Gaudentia Kabaka akisalimiana na Mhashamu Askofu Mkuu wa Kanisa Katoliki Jimbo la Musoma Mkoani Mara, Michael Msongazila mara baada ya kuwasili kwenye mahafali hayo.

Kwaya ya vijana ya mara ikiimba wimbo wa Taifa kabla ya kuanza kwa sherehe za mahafali ya sita ya kituo cha kupambana na ukeketaji Masanga wilayani Tarime mkoani Mara.

Mgeni rasmi Mh. Kabaka, Bw. Alvaro Rodriguez na SSP. Simon Mrashani wakishiriki kucheza wimbo maalum unaohamasisha kukataza vitendo vya uovu vya Ukeketaji kwa watoto wa kike wakati wa mahafali hayo.

Meza kuu ikitoa heshima kwa wimbo wa taifa.

Mkurugenzi wa Kituo cha kupambana na ukeketaji cha Masanga (TFGM), Tarime, mkoani Mara, Sista Germaine Baibika akimkaribisha mgeni rasmi pamoja wageni waalikwa kwenye sherehe ya mahafali ya sita ya mabinti waliokwepeshwa msimu wa ukeketaji.

Mgeni rasmi Waziri wa Kazi na Ajira Mh. Gaudentia Kabaka akifurahi jambo na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez kwenye sherehe za mahafali hayo.

Mgeni rasmi Waziri wa Kazi na Ajira Mh. Gaudentia Kabaka akizungumza kwenye sherehe za mahafali ya sita ya mabinti waliokwepeshwa msimu wa ukeketaji.

Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez akitoa salamu za Umoja wa Mataifa katika sherehe za mahafali sita ya mabinti waliokwepeshwa msimu wa ukeketaji.

Mkuu wa Wilaya ya Tarime, mkoani Mara, Bw. John Henjewele akitoa salamu kwa niaba ya Mkuu wa Mkoa wa Mara katika mahafali ya sita ya kituo cha kupambana na ukeketaji cha kijiji cha Masanga (TFGM) cha wilayani Tarime, mkoani Mara.

Mwakilishi wa Shirika la Umoja wa Mataifa linaloshughulikia Idadi ya watu duniani (UNFPA), Dkt Natalia Kanem, akizungumza kwenye sherehe hizo.

Kaimu kamanda wa polisi wa kanda maalum ya Tarime na Rorya SSP. Simon Mrashani akieleza jinsi jeshi la polisi linavyoshiriki katika kupambana na masuala ya unyanyasaji wa kijinsia likiwemo suala la kesi za ukeketaji ambapo pia alitoa takwimu za kesi zilizoripotiwa kituoni mpaka sasa ni 141, huku 80 zikiwa Mahakamani na 20 zimetolewa hukumu.

Mtaalam wa Mahusiano na Mawasiliano wa Umoja wa Mataifa (UN) Tanzania, Hoyce Temu akifurahi jambo na baadhi ya wafanyakazi wenzake wakati wa sherehe za mahafali hayo.

Wahitimu 37 wakila kiapo cha kutokubali kutoshiriki kukeketwa na kuwa mabalozi wazuri kwenye jamii zao katika kuelemisha madhara ya ukeketaji kwa wanaoendeleza mila na tamaduni hizo pindi warudipo majumbani. Kwa picha zaidi ingia humu