MUSSA NTIMIZI MWENYEKITI MPYA CCM UYUI,...DK.MFUTAKAMBA AANGUKA UJUMBE WA NEC

UCHAGUZI wa CCM wilaya ya Uyui mkoani Tabora,umekamilika jana,huku
uenyekiti ukiangukia kwa Musa Ntimizi, akimshinda mwenyekiti wa zamani
Abdalah Kazwika.
Musa Ntimizi ni mtoto wa mbunge mstaafu wa jimbo la Igalula,Tatu Ntimizi.

Wakati hayo yakijiri,mbunge wa jimbo la Igalula Dkt Athuman Mfutakamba
alijikuta kwenye wakati mgumu pale alipoangukia pua kwa kushindwa kiti
cha NEC huku akipigwa swali zito ambalo lilionekana kummaliza.

Dkt Mfutakamba wakati akijieleza mbele ya wajumbe aliulizwa ni vipi
anataka ujumbe wa NEC ilihali unaibu waziri wa Uchukuzi ulimshinda na
rais Jakaya Kikwete akamuondoa.
Katika majibu yake Dkt Mfutakamba alijibu kuwa siyo kwamba alishindwa
kazi na rais akamuondoa bali tuhuma dhidi yake zilikuwa za kupikwa
namajungu tu.

Awali uchaguzi huo wakati umeshafanyika na kura zinahesabiwa,naye
mbunge wa jimbo la Tabora Kaskazini Shaffin Sumar, majira ya saa
10:08,aliwashangaza wajumbe wa mkutano baada ya kutoka ndani ya chumba
cha kuhesabia kura kwa hasira akidaiwa kuona upepo mbaya kwa mtu wake
ambapo alipanda gari yake na kuondoka na hakurudi tena hadi matokeo
yanatangazwa.

Shaffin Sumar inadaiwa kuwa ni mfuasi wa mwenyekiti aliyeshindwa
kwenye kinyang`anyiro hicho,Abdalah Kazwika na alikuwa akimfanyia
kampeni kubwa kiasi cha kuzua malalamiko toka kwa wagombea wengine
ambao waliandika barua za malalamiko.

Aidha katika uchaguzi huo ulioanza majira ya saa 12:20 mchana,matokeo
yake yalitangazwa saa 07:03 usiku.

Akitangaza matokeo hayo msimamizi wa uchaguzi huo,mstahiki meya wa
manispaa Tabora,Ghulamdewji Remtulah alisema mshindi wa nafasi ya
mwenyekiti ni Musa Ntimizi, aliyepata kura 769,akifuatiwa na
mwenyekiti wa zamani Abdalah Kazwika aliyepata kura 544,na Hamis
Bundala, alipata kura 26 na kura zilizopigwa ni 1,412 na
zilizoharibika ni 24.

Remtulah alitangaza pia matokeo ya nafasi ya ujumbe wa NEC,ambapo
afisa mtendaji wa kata ya Ufuluma wilaya ya Uyui,Beatus Mlolwa
alishinda kwa kishindo kwa kupata kura 706 akimshinda mbunge wa jimbo
la Igalula, Dkt Athuman Mfutakamba akiambulia kura 231,na Shija Humbi
kura 200 na kura zilizopigwa ni 1,359 na zilizoharibika ni kura 51.

Aidha katika nafasi ya ujumbe wa mkutano mkuu mkoa,washindi walikuwa
watano ambapo Joseph Kidaha alipata kura 873,akifuatiwa na mke wa meya
wa zamani wa jiji la Dar-es-Salaam,Kitwana Kondo,Hanifa Kondo, kura
852,James Januari kura 487,Msafiri Abduhamad kura 449, naDavid
Malicela kura 385, na kurabzilizopigwa zilikuwa ni 1,433.

Akishukuru wajumbe wa uchaguzi huo,mwenyekiti mpya wa CCM wilaya ya
Uyui,aliwashukuru wajumbe hao na kuahidi kutokomeza makundi yote na
kwamba kila mwanachama hadi sasa ni wake.

“Nitashirikiana na wanaCCM wenzangu sina kinyongo na wote ambao
hawajanipigia kura CCM ni ya wote kamwe sitabagua wala kuendekeza
makundi ambao yanakibomoa chama chetu.” alisema Ntimizi.

Aidha taarifa ambazo hazijathibitishwa na katibu wa CCM wilaya ya
Uyui,Flavian Wangwe zinasema Dkt Athuman Mfutakamba, amewasilisha
malalamiko akidai amechakachuliwa.
Hata hivyo gazeti hili lilimshuhudia Dkt Mfutakamba, akiwa nje ya
ofisi ya CCM Uyui akilalalama kuwa alichezewa faulu hakuwa mtu wa
kushindwa kiti cha NEC.